Skriviskeið á Gjáargarði

1 apr 2025

Í vikuskiftinum skipaði MáF fyri skriviskeiði á Gjáargarði.

Skriviskeiðið snúði seg hesa ferð um at læra at skriva eitt stutt leikrit, har spælitíðin varar í minsta lagi 5 minuttir og í mesta lagi 15 minuttir. Luttakararnir lærdu, hvussu teir stutt og neyvt kundu skriva eina søgugongd á ein spennandi og áhugaverdan hátt, sum helst skuldi halda áhugan hjá áskoðaranum fangaðan.

Tað var spennandi at síggja í endanum av skeiðnum, hvat luttakararnir høvdu fingið burturúr. Nakrir høvdu skrivað leikrit til stuttfilm, meðan aðrir høvdu skrivað leikrit til sjónleik.

Undirvísari var dugnaliga Gunvør Reynberg, sum fleiri ferðir hevur undirvíst á skriviskeiðum hjá MáF áður. Gunvør er útbúgvin sjónleikari á Statens Teaterskole og hevur arbeitt sum sjónleikari á eitt nú Aalborg Teater og Det Kongelige Teater og eisini hevur spælt í fleiri kabarettum. Umframt at arbeiða sum sjónleikari og leikstjóri, hevur Gunvør í fleiri ár arbeitt sum tekstahøvundur, har hon hevur skrivað tekstir til m.a. fleiri kabarettir og poppsangir, og eisini hevur hon skrivað fleiri barnabøkur og somuleiðis umskrivað barnabøkur til eitt nú familjusangleikir.

Samanumtikið eitt væleydnað skeið, har luttakararnir tóktust sera væl nøgdir og hildu seg hava lært nógv og fingið nøkur amboð, teir kundu taka við sær at arbeiða víðari við og brúka til núverandi og komandi verkætlanir.

Allir luttakararnir fingu handa prógv fyri fullført skeið.